गाँजासहित युवा पक्राउ

धरानः धरान प्रहरीले सेउतीपुलबाट गाँजासहित युवालाई पक्राउ गरेको छ ।
धरान उपमहानगरपालिका वडा नं. ८ तीनकुने चोकस्थित अस्थायी प्रहरी चौकी तीनकुनेबाट खटिएको प्रहरी गस्ती टोलीले धरानबाट इटहरीतर्फ जाँदै गरेको बा८३प २९०४ नम्बरको २२० सिसीको पल्सर मोटरसाइकललाई रोकी चेकजाँच गर्न खोज्दा नरोकी भागेको थियो ।
शंका लागेर पिछा गर्दै जाने क्रममा सेउती पुल छेऊमा सो मोटरसाइकल आफै अनियन्त्रित भई सडकमा लडेको अवस्थामा फेला परेको थियो ।
मोटरसाइकल चालक फरार रहेको र सो मोटरसाइकलको पछाडि सवार जिल्ला धनकुटा सहिदभूमी गाउँपालिका वडा नं.२ बस्ने २१ वर्षीय सुरेश शिवालाई पक्राउ गर्दा निजको साथमा रहेको २ (दुई) वटा जेब्रा झोलाहरु चेकजाँच गर्दा झोलाभित्र सेतो प्लाष्टिकले प्याक गरेको अवस्थामा लागूऔषध गाँजा २९ केजी फेला परेको प्रहरीले जनाएको छ ।
शिवा र मोटरसाइकलसहित नियन्त्रणमा लिई इलाका प्रहरी कार्यालय धरानले थप अनुसन्धान गरिरहेको र चालकको को हुन् भन्ने खुलिसकेकोले उनको खोजी कार्य भइरहेको प्रहरीले जनाएको छ ।