शुभचन्द्र राईको कथा सङ्ग्रह ‘समयले जन्माएका कथाहरू’ लोकार्पण

सुनसरी ः कथाकार शुभचन्द्र राईको कथा सङ्ग्रह ‘समयले जन्माएका कथाहरू’ बुधबार धरानमा लोकार्पण गरिएको छ ।
धरान उपमहानगरपालिकाका निवर्तमान प्रमुख तिलक राई, भाषाविद् प्रा.डा. टङ्कप्रसाद न्यौपाने, नाट्यकर्मी गोपाल देवान, कथाकार शुभचन्द्र राईले विमोचन गर्नु भएको थियो ।

कथाको समीक्षा गर्दै प्रा.डा न्यौपानेले भन्नुभयो, ‘शुभचन्द्रका ७ वटा कथा पढ्दा भाषामा जनबोली रहेको छ । गाउँघरमा हामी जे बोल्छौँ, त्यो यहाँ आएको छ, कथामा ग्रामीण परिवेश अधिक रूपमा आएको उहाँले बताउनुभयो ।
अर्का समीक्षक गोपाल देवानले नेपाली साहित्यको क्षेत्रमा एउटा इँटा थप्न सफल भएको बताउनुभयो । उहाँले शिल्पगत हिसाबमा निकै सशक्त रहेको बताउनुभयो ।
उहाँले भन्नुभयो,विचारगत रूपमा पनि सशक्त छ,यो एउटा समय र कालखण्डको कथा मात्रै होइन, सबै समय र कालखण्डको कथा हो ।

सीमान्तकृत, किनारीकृतहरूका बिम्ब, मिथक र प्रतीकहरू आएका छन् उहाँले भन्नुभयो, परिवेश प्रस्तुत गर्ने शैली पनि एकदमै राम्रो रहेको छ । चरित्रचित्रण, परिवेश चित्रण अन्त्यन्तै राम्रो रहेको छ उहाँले यो सामाजिक यथार्थवादी कथाकै रूपमा रहेको औँल्याउनुभयो ।
कथा प्रकाशनमा सम्पादन पत्रकार गणेश राईले गर्नुभएको थियो, कथाकार राईको यसअघि पनि केही कविता सङ्ग्रहहरू प्रकाशन भइसकेको उहाँले बताउनुभयो ।
कथाकार शुभचन्द्र राईले आफूले सत्य घटनालाई नै कथाको रूपमा उतारेको बताउनुभयो । मैले सत्य घटनालाई कथाको स्वरूपमा ढालेको हुँ उहाँले भन्नुभयो, ।
ओखलढुंगाको वामधालमा २०२४ सालमा जन्मिनुभएको राई वाम्बुले राई भाषाका लेखक समेत हुनुहुन्छ । उहाँको पहिलो कृति “ल्आकाचिम सारिङ्मो” (रातो भाले) २०६८ सालमा प्रकाशित भएको थियो । धरानमा हुर्केर शिक्षा हासिल गर्नुभएको राई २०४० सालदेखि शिक्षण, सामाजिक सेवा र साहित्य सिर्जनामा सक्रिय हुनुहुन्छ । हाल उहाँ बेलायतमा बसोबास गर्दै आउनुभएको छ ।