धरान । २५ औं संस्करणको गोधुली रनिङ कप फुटबल प्रतियोगितामा क्वाटर फाइनल समिकरण पुरा भएको छ । बुधबार साँझ धरान–६ र धरान–१० बीचको खेल सम्पन्न भएसँगै क्वाटर फाइनल समिकरण पूरा भएको हो ।
बुधबार भएको खेलमा ६ नं. वडाले ४–० को फारकिलो जित दर्ज गरेको छ । विजयी भएको ६ नं. वडाले क्वाटर फाइनलमा १४ नं. वडासँग प्रतिष्पर्धा गर्नेछ भने पराजित भएको १० नं. वडा प्रतियोगिताबाट बाहिरिएको छ ।
खेलको सुरुवातदेखि नै १० नं. वडालाई दबाबमा राखेको ६ नं. वडाले १३ औ मिनेटमा नै गोल गरेको थियो । ६ नं. का सन्देश राईले गोल गर्दै टोललाई अग्रता दिलाएका थिए । खेलेको १८ औं मिनेटमा सुवास राना मगरको गोल मार्फत् अग्रता दोब्बर बनायो भने त्यसको एक मिनेट वित्न नपाउदै सन्देश राईले अग्रता तेब्बर बनाए ।
पहिलो हाफमा ३–० ले पछि परेको धरान–१० ले दोस्रो हाफमा सुधारिएको प्रदर्शन गर्यो । खेलको ५० औ मिनेटमा यमन मगरेले अर्को गोल थपेपछि ६ नं. वडाले फराकिलो जित हासिल गर्यो । खेलको म्यान अफ द म्याच ६ नं. वडाका सन्देश राई घोषित भए । उनलाई माउण्ट एभरेष्ट ट्रेनिङ सेन्टरका सञ्चालक कुमार तामाङले नगद पुरस्कार हस्तान्तरण गरेका थिए ।
बिहीाबर गतवर्षको विजेता धरान वडा नं. १३ र उपाधिको दाबेदार मध्येको एक १५ नं. वडा बीच पहिलो क्वारटर फाइनल खेल हुने आयोजकले जानकारी दिएको छ । बुधबार साझ ६ः३० बजे धरान रंगशालामा वडा नं. १३ र वडा नं. १५ बीच खेल हुने आयोजकले जानकारी दिएको छ । चैत्र २१ गतेसम्म सञ्चालन हुने प्रतियोगितामा धरानका १८ वटा वडा सहभागी छन् ।
प्रतियोगिताको विजेताले १ लाख ५० हजार र उप विजेताले ७५ हजार नगद पुरस्कार प्राप्त गर्नेछन् भने प्रतियोगिताको क्वाटर फाइलनमा पुगेको टिमले स्व. सुवास राई स्मृति सुपर ८ प्रतियोगितामा सहभागी हुने अवसर प्राप्त गर्ने आयोजक गोधुली क्लबका उपाध्यक्ष सतिस केसीले जानकारी दिए ।
