पत्रकार हत्याको विरोधमा झापाका पत्रकारहरु आन्दोलित

बिर्तामोड । पत्रकार सुरेस रजकको जिउँदै जलाएर गरिएको हत्या तथा सञ्चार माध्यम माथी भइरहेको आक्रमण विरुद्ध झापामा पत्रकारहरुले बिरोध र्याली गरेका छन् ।

पुर्व राजा ज्ञानेन्द्र शाहका समर्थकहरूले शुक्रवार काठमाडौंको तिनकुनेमा गरेको हिंसात्मक आन्दोलनमा पत्रकार सुरेश रजकको हत्या भएको थियो । उनलाई राजावादीहरुले एक व्यक्तिको निजि घरमा आगजनी गरि घरभित्र थुनेर हत्या गरेका थिए ।

नेपाल पत्रकार महासंघ झापाको अगुवाइमा पत्रकार रजकको मृत्युको सत्यतथ्य पत्ता लगाएर दोषीमाथि कडा कारबाहीको माग गर्दै शनिबार दिउँसो बिर्तामोडमा विरोध र्यालीसहित प्रदर्शन गरिएको हो ।

शुक्रबार पुर्व राजाका समर्थकहरूले गरेको आन्दोलनको रिपोर्टिङ गर्ने क्रममा एभिन्युज टेलिभिजनका पत्रकार रजकको शव जलेको अवस्थामा भेटिएको थियो ।

बिर्तामोड परिक्रमा गरेको विरोध र्यालीपछि मुक्तिचोकमा कोणसभा गरिएको थियो । कोणसभामा पत्रकार महासंघ झापाका पूर्व अध्यक्षहरु कृष्ण हुमागाई, गणेश पोखरेल, मोहन काजी, झापा बारको तर्फबाट पत्रकार महासंघ झापाका पूर्व अध्यक्ष समेत रहेका तारामणि सापकोटा, मानवअधिकारकर्मी डा.रुपक खनालले सम्बोधन गरेका थिए । उनीहरुले पत्रकार सुरक्षाको ग्यारेन्टीको माग गरेका छन् । पत्रकार हत्याका विरुद्ध सशक्त आन्दोलन जारी राख्नुपर्ने बताउँदै दोषीलाई कारबाही गर्न माग गरेका छन् ।

पत्रकार महासंघ झापाका अध्यक्ष एकराज गिरीले पत्रकारको जिउधनको सुरक्षाका लागि सम्पूर्ण पत्रकारहरू एकताबद्ध भएर लाग्नुपर्नेमा जोड दिए । उनले मृतक पत्रकार रजकलाई न्याय दिलाउन महासंघ निरन्तर लाग्ने प्रतिबद्धता व्यक्त गरे । उनले विरोध र्यालीमा ऐक्यवद्धता जनाउने पत्रकारजन्य संघ संगठनहरु प्रेस चौतारी, प्रेस युनियन, प्रेस सेन्टर, फोनिज, नारी सञ्चार गृह, सञ्चारिका समूह, बिर्तामोड नगर उपप्रमुख नगेन्द्र प्रसाद संग्रौला , बिर्तामोड उद्योग वाणिज्य संघ, सबैलाई धन्यवाद व्यक्त गरे ।