सुनसरी ः लागुऔषध सहित सुनसरीबाट प्रहरीले ९ जनालाई पक्राउ गरेको छ ।
भारतबाट लागुऔषध खैरो हेरोइन (ब्राउन सुगर) खरिद गरेर फर्किएका ९ जनालाई सुनसरीको कोशी गाउँपालिकाबाट पक्राउ गरेको छ । कोशी गाउँपालिका–१ स्थित भन्सार कार्यालय अगाडिबाट उनीहरु बुधबार पक्राउ परेका हुन् ।
पक्राउ परेकाहरुको साथबाट लागुऔषध खैरो हेरोइन (ब्राउन सुगर) जस्तो देखिने वस्तु बरामद गरिएको सुनसरी प्रहरीका प्रवक्ता डीएसपी योगराज खतिवडाले बताए ।
लागुऔषध नियन्त्रण ब्युरो विराटनगर र सुनसरीको इलाका प्रहरी कार्यालय लौकहीबाट खटिएको टोलीले चेकजाँच गर्दा साथबाट ब्राउन सुगर फेला पारेपछि ९ जनालाई पक्राउ गरिएको जानकारी खतिवडाले दिए ।
पक्राउ परेकाहरु भारत पुगेर लागुऔषध खरिद गरी मोटरसाइकल र स्कुटरमा नेपाल आएका थिए भने केही पैदल नै आएका हुन् । पक्राउ परेकाहरुलाई जिल्ला प्रहरी कार्यालय सुनसरीको हिरासतमा राखिएको छ । उनीहरुविरुद्ध लागुऔषध ऐनअन्तर्गतको मुद्दा चलाइने डीएसपी खतिवडाले बताए ।
उनका अनुसार पक्राउ परेकाको साथबाट ब्राउन सुगरजस्तो देखिने वस्तु १ सय ग्राम ५ मिलिग्राम बरामद भएको छ । एउटा मोटरसाइकल र एउटा स्कुटरसमेत प्रहरीले नियन्त्रणमा लिएको छ ।
पक्राउ पर्नेमध्ये सुनसरीको इटहरी उपमहानगरपालिका–१६ का ३४ वर्षीय मनोजकुमार चौधरी पनि छन् । उनको साथबाट २७ ग्राम २ सय ७० मिलिग्राम ब्राउन सुगरजस्तो देखिने वस्तु बरामद भएको प्रहरीले जनाएको छ । इटहरी–६ का २३ वर्षीय सनम तामाङको साथबाट २६ ग्राम बरामद भएको छ ।
त्यस्तै, मोटरसाइकलमा सवार रहेका इटहरी–२ का २७ वर्षीय निरज लिम्बूको मलद्वारबाट ३ ग्राम ५ सय ६ मिलिग्राम बरामद भएको छ । मोटरसाइकलको पछाडि सवार इटहरी–२ का २२ वर्षीय सन्दीप मगरसमेत पक्राउ परेका छन् ।
सुनसरीको रामधुनी नगरपालिका–९ का आदित्य चौधरीको साथबाट २ ग्राम १ सय मिलिग्राम बरामद भएको छ । स्कुटरमा सवार धरान उपमहानगरपालिका–१७ का २८ वर्षीय बेगराज लिम्बूको साथबाट ३ ग्राम १ सय ३० मिलिग्राम बरामद भएको छ । स्कुटरको पछाडि सवार धरान–१७ कै ३४ वर्षीय सागर राई पनि पक्राउ परेका छन् ।
रामधुनी–२ का २६ वर्षीय मनिष चौधरीको साथबाट २ ग्राम ५ सय ६० मिलिग्राम र रामधुनी–५ का २६ वर्षीय विज्ञान साहको साथबाट ३५ ग्राम ८ सय ८० मिलिग्राम ब्राउन सुगरजस्तो वस्तु बरामद भएको प्रहरीले उल्लेख गरेको छ ।
पछिल्लो समय सुनसरी प्रहरीले लागुऔषध नियन्त्रणमा सक्रिय भएको छ । लागुऔषध नियन्त्रण गरी त्यसको ओसारपसार एवं कारोबारमा संलग्नलाई पक्राउ गरेर कारबाहीको दायरामा ल्याउन सुनसरी प्रहरी प्रमुख एसपी सुमनकुमार तिम्सिनाले विशेष टोली परिचालन गरेका छन् ।
