वस्तीवासीसंग एमाले उमेदवारहरुको भोजन

धरान : नेकपा (एमाले) को चुनावी घरदैलो पछि उमेदवारहरुले धरान ७ स्थित दोभान लाईनको भूमिहिन आधारभूत वस्तीवासीसंगै खानपान गरेकाछन् ।
सूर्यध्वजावाहक उमेदवारहरु टीकाराम लिम्बू र समानुपाति उमेदवार मौसम राई सहित एमाले नेताहरुले समेत वस्तीमै दिवा खाना खाएकाछन् । वस्तीवासी यातायात मजदुर विसन श्रेष्ठ र विमला श्रेष्ठको घरमा सामुहिक खानपान गरिएको हो ।
चुनावी घरदैलो कार्यक्रमको समापन संगै दिउसो १२ बजे दुइघरमा एमाले उमेदरवार, नेताहरु, पार्टी सदस्य तथा शुभचिन्तक सहित १ सय ५० जनाले सामुहिक खानपान गरिएको धरान ७ नम्बर वडामा युवा नेता ठाकुर कार्कीले जानकारी दिए ।
एमाले हामी मजदुर सुकुम्बासीको पार्टी भएको र यो चुनावी अभियानमा सबैलाई होटलमा व्यवस्थापन गर्न समस्या हुने भएकाले हामीले हाम्रै वस्तीमा खानपानको व्यवस्था गरेको विसन श्रेष्ठले बताए ।
पार्टीलाई यो अभियानमा सहयोग गर्न पाएकामा आफुहरु खुशी भएको विमला श्रेष्ठले बताए । हामी घरदैलोमा पनि घरघर पुग्यौँ र सबैलाई घरमा ल्याएर संगै खाना खायौँ उनले भनिन् ।
दोभानलाईनमा रहेका २९ घरपरिवार अधिकांश एमालेको आस्थामा रहेकाले टोलवासीले संयुक्त रुपमा घरदैलोमा सहभागीहरुलाई खानाको व्यवस्थापन गरेको धरान ७ नम्बर निर्वाचन परिचालन समिति संयोजक काजी गिरीले बताए ।
शुक्रबार धरान ३, धरान ७, धरान ९ र १२ नम्बर वडामा घरदैलो कार्यक्रम रहेको प्रचार समितिका संयोजक भीमज्वाला राईले बताए । फागुन ९ गते शनिबार भने धरान १३ र १४ नम्बर वडामा उमेदवारहरुलाई घरदैलोमा लैजाने कार्यक्रम रहेको संयोजक राईले बताए ।