अजेन्द्र वाईबा तामाङ
असार ३२,पाँचथर। पाँचथरको फिदिम खानेपानी तथा सरसफाइ उपभोक्ता समितिले १२ आना जग्गा खरिद गरेको छ । भविष्यमा खानेपानी पूर्वाधार विस्तार तथा थप सेवा सुधारका गर्नको लागि फिदिम नगरपालिका–१ को माथिल्लो गाउँ स्थित खानेपानी ट्यांकी रहेकै स्थानमा करिब ३० लाख रुपैयाँमा खरिद गरिएको समितिले जनाएको छ।
समितिका अनुसार हाल कुल ३,००४ वटा धारा दर्ता रहेकामा २,३८० वटा सञ्चालनमा छन् भने ६२४ वटा धारा अझै जडान हुन बाँकी रहेका छन्।
समितिले उपभोक्तालाई राहत दिने उद्देश्यले खानेपानी महसुलमा कमी गर्ने निर्णय गरेको छ। समितिका अध्यक्ष प्रकाश गुरुङको नेतृत्वमा रहेको नयाँ कार्यसमितिले करिब १९ वर्षदेखि कायम रहेको महसुल प्रणालीलाई परिमार्जन गर्दै उपभोक्तालाई प्रत्यक्ष लाभ पुग्ने व्यवस्था गरेको जनाएको छ।
समितिका अनुसार यसअघि १० युनिटसम्मको पानीका लागि २८५ रुपैयाँ तिर्नुपर्ने व्यवस्था रहेकोमा अब १२ युनिटसम्मको न्यूनतम महसुल २४६ रुपैयाँ कायम गरिएको छ। साथै, अपेक्षाकृत विकट क्षेत्रमा रहेका उपभोक्ताका लागि न्यूनतम महसुल २२१ रुपैयाँ निर्धारण गरिएको छ। आगामी दिनमा थप ३ युनिट छुट प्रदान गर्दै १५ युनिटसम्म यही दरमा सुविधा दिने तयारी भइरहेको अध्यक्ष प्रकाश गुरुङ र सचिव कमल बास्कोटाले जानकारी दिएका छन्।
त्यसैगरी उपभोक्ताबाट उठ्न बाँकी बक्यौता रकम ४४ लाख ९० हजार ७४६ रुपैयाँ रहेको जनाएको छ। समितिले बक्यौता रहेका सबै उपभोक्तालाई आगामी ७ दिनभित्र अनिवार्य रूपमा बाँकी रकम बुझाउन आग्रह गरेको छ। तोकिएको समयभित्र बक्यौता नबुझाए खानेपानीको लाइन काटिने चेतावनी पनि समितिले दिएको छ।
हाल फिदिम नगरपालिका–१, २ र ४ का उपभोक्तालाई उपलब्ध पानीको स्रोत र वितरण व्यवस्थापनलाई मध्यनजर गर्दै पालो प्रणालीमार्फत खानेपानी वितरण भइरहेको समितिले जनाएको छ।
समितिले महसुल घटाउने, पूर्वाधार विस्तार गर्ने तथा बक्यौता संकलनलाई प्रभावकारी बनाउने निर्णयले खानेपानी सेवा थप व्यवस्थित र दिगो बन्ने विश्वास व्यक्त गरेको छ।
