सुनसरी ः झापा११ फुटबल क्लब भद्रपुर झापा गोल्डकपको फाइनल प्रवेश गरेको छ ।
बुधबार भएको सेमिफाइनलमा डागा युनाइटेड भुटानलाई ३–१ गोलअन्तरले पराजित गर्दै झापा ११ फाइनल प्रवेश गरेको हो ।
मेची रंगशालामा भएको अन्तिम सेमिफाइनलमा झापा ११ का लागि एरोन थापा, रोहन कार्की र हरिबहादुर आलेमगरले गोल गरेका हुन् । भुटानका लागि सुरज रसाइलीले सान्त्वना गोल गरे।
पहिलो हाफ गोलरहित भएको थियोे । खेलको ५५ औँ मिनेटमा झापा ११ का लागि एरोन थापाले गोल गर्दै टिमलाई अग्रता दिलाएका थिए । तर, खेलको निर्धारित समय सकिन ४ मिनेट बाँकी रहँदा भुटानका सुरज रसाइलीले एकल प्रयासमा गोल गरेर टिमलाई कमब्याक गराएका थिए । थपिएको ५ मिनेट भित्र दुई गोल गर्दै झापा ११ ले आफूलाई सशक्त टिम सावित गरेको हो ।
खेलको इन्जुरी समयमा रोहन कार्की र परिवर्तित खेलाडी हरिबहादुर आलेमगरले झापा ११ का लागि गोल गरेका हुन् । खेलको प्लेयर अफ दी म्याच एरोन थापा भए । उनले नगद २१ हजार रुपैयाँ प्राप्त गरे ।
जितसँगै झापा ११ले उपाधिका लागि आयोजक भद्रपुर ब्लेजर्स एफसीसँग भीडन्त गर्नेछ । शुक्रबार हुने फाइनल खेलको विजेताले नगद १३ लाख र उपविजेताले ७ लाख रुपैयाँमा पाउनेछ ।
प्रतियोगिताको प्लेयर अफ द टुर्नामेन्टले नगद एक लाख पाँच हजार रुपैयाँ पाउनेछन् । उत्कृष्ट गोलकिपर, उच्च गोलकर्ता, उदीयमान खेलाडी र प्रशिक्षकले नगद २५ र २५ हजार पाउने आयोजकले जनाएको छ
